عمر اﻟﻌﺸﮒ ما شابْ -فهيم عيسى السليم

عمر اﻟﻌﺸﮒ ما شابْ
فهيم عيسى السليم
في اللحظة التي سمعت فيها النبأ الكاذب عن وفاة الشاعر الكبير مظفر النواب كتبت:
يا بو أصابع ذهب يا خوية يا نوابْ
الكلب نار إشتعل والشعر كله إنصابْ
جا بعد ياهو اليمد للسمرة صوت الغزلْ
وجابعد ياهو اليفك للناس باب الأملْ
يا بو أصابع ذهب يا خوية يا نوابْ
من رحت راح الشعر ياسيد الأحبابْ
وها أنذا أضيف بعد التكذيب:
يا بو كلام الترف متروس كلّه شكرْ
لفلفت خيط الشمس ووديته عد الكمرْ
أكتب ياخويه شعر ودزّه بونين الريلّ
الشعر بعدك ﺤﭼﻲ ماله بحنين الليلْ
تعبنه حيل الوكت والشوﮒ هد الحيلْ
إنته أبونه الصدﮒ ولو طاح نجم ذويل
طاح الشعر وإندثر وإنشل صهيل الخيل
إكتب وإكتب بعد ياخويه يا نوابْ
اﻟﮕاع عطشى إلك وبعده الجرح ما طابْ
العطّاب كلّش أكو وما ينفع العطابْ
شلفوده ﮔهوة وضوه بليّة شعر نوابْ
إنت عمود الشعر ياسيد الأحبابْ
إكتب وإكتب بعد ياخويه يانوابْ
وين القطار العبر صاح ونسه العشاﮒْ
كل السجج هودرن وظل اﻟﮕطه المشتاﮒْ
مايصير هذا الوطن طول العمر ينباﮒْ
إكتب وإكتب بعد ما تخلص الأشواﮒْ
إنته حبيب الوطن يا خشبة السكّانْ
إنته رﮔبة اﻟﻌﺸﮓ والمعبر الولهانْ
وإنته حلاة الزرع ياأول الريحانْ
إكتب وإكتب بعد ياخويه يانوابْ
عمرك بطول اﻟﻌﺸﮓ
وعمر اﻟﻌﺸﮓ ما شابْ
عمر اﻟﻌﺸﮓ ما شابْ

نيسان2011
أوكلاند نيوزيلاند