( سوله بينه )
الى قلبي الذي رحل !!!!
حامد كعيد الجبوري
سوله بينه
من نطبّلها المقابر
مانكابر اللوحة د.صفاء السعدون
وتمطر العينين دمعه
دموعنه دموع الصرايف ...
والحنين
كاولّي ودمعة ربابه
دموع ابويه
دموع امي ..
العكدت الضيم بصبرها
وغايبه اسنين الفرح
دموع جمره
نرشها فوك اكبورنه
يطيب الجرح
وبينه سوله
صغار نكبر بالجروح
وبينه سوله
أجروحنه لمن تهيد
تهيد
ويفّزها ملح
وبيه سوله
من أطبلها المقابر
أترس جيوبي ( نساتل ) 1
وبيدي ....
بيدي ( نفاخه )2 و ( قلم )
أوكف أباب القبر
وأهمس حنين ........
وحشه دياركم سكان الكبور
عفتوا للدلال وعفتو القصور
وأشهك بالنواعي الروح
تنور
واسأل للكبر خلصتوا الدروس ؟
قريتو ( موطني ) وسديتوا الصفوف ؟
وزعتوا الشهايد عالتلاميذ ؟
ويا طالب أخذ أكبر علامات ؟
ويا هو الطلع اول بالشهادات ؟
وهم عدكم فرص ما بين الدروس ؟
أصيح وتبجي الكبور
( يمحمد بويه محمد )3 ...
( على بالي أبد ماجان فركاك
وأكضي للعمر ياريت وياك )4
أصيح وتبجي الكبور ...
أيخاف الظلام الطفل وبطن الكبر هندس
أنفض تراب الكبر بيتك حلو يوّنس
وسنين مره أنكضت ابكلبي الحزن يردس
أتجبح اعله الكبر وبذن الكبر أهمس
زغير وديعة علي لا يعرف ولايحس
أمروتك أعذرني ( حماده )
ما جبت ( مصياده )5 بويه
خاف يتعوّر كبر
هاي نستلتك حبيبي
وهاي ( نفاخة ) حبيبي
وصره من دموع أمك
حطها بخدودك ذخر
و ( حمد ) لا تنسه الوصيه
مشتهي يمك كبر ...
أشتهي يمك كبر
-----------------
1 : حلوى
2 : بالون يعبأ بالهواء ليلعب به الأطفال
3 ، 4: أغاني عراقية قديمة
5 : آلة لعب خشبية ذات سيقان بلاستيكية يوضع
الحصى بداخلها لاصطياد الطيور البرية ويستخدمها الأطفال حصرا .
ليست هناك تعليقات:
إرسال تعليق