( اليوم عيد )
الى ( ل ) تفحصي قلبك ستجدينني فيه
حامد كعيد الجبوري
اليوم عيد
اليوم البس كل عمر
عمري الجديد
اليوم اصعد للسمه
وأشتم الكمر
اليوم أجيب النجمه
ترجيه الحبيبي
اليوم ما ألبس حزن
ألبس حرير
أمطرز أبماي النده
ويمطر عشك
بيدي أمشط ليل صبري
وأغزل خيوط الفرح
وأغسل همومي
وعطش كل السنين
وأهمس بأذنك هلاهل
يا كمر يا عالي ردلي
شوف كذلة تلبس عيون السنابل
ويركص البيدر غرام
اليوم أطش الروح
بيد الله عتب
إني رايد
كل حلاتك
كل حلاتك
واشرب شفافك عنب
اليوم طعم الفرح هيل
أركض أركض
ما تصل روحك تعب
اليوم طول السهر ليل
ليل ما يخلص سوالف
تلعب أنهودك رطب
طاير أجناحين شوكي
وانثر النجمات بدروب الهوه
اليوم أشوفك تلعب بروحي
تراتيل ونشيد
اليوم كلبي بيك
يكبر
يكبر وينزل بنفسج
ويزرع بحضنك بريد
اليوم عيد
وغير عيدك ما أريد
غير كلبك ما أريد
وما أريد
ليست هناك تعليقات:
إرسال تعليق