حامد كعيد الجبوري
للصديق الشاعر المغترب رياض النعماني
ماتشتاك ......
لخيار الشواطي وللبساتين
والرمان المـفلَع عوافي
للبرحيه ، والريحان ، والنبك العَجم.....
والريحة العنبر
ماتشتاك.......
تنزع ثوب حزنك والنهر خنياب1
والحلوات يملَن وشلة أخدودك
ويفلـَّن صُبر عمرك كصايب
والحلوه.....
أم أضـفيرة السنبل
تُكي الشام وَجنتها
وتفيفـيـح ريحتها
وكحت عين ......
باكت ثوب عُمرك ...
زمت النهدين
وبضحكة غنج ...
تشبر طولك النعناع
وغسلت بالنهر دشداشة الغربه
الهذاك الصوب عُبرت
عينها المشحوف
والصُفصاف ظلها...
والبلابل بيت
ماتشتاك ...
كهاوينه ..
وجايها السنكين
وحـديثات ...
تفرش لـلـجرف صـوبين
(والداخل حسن)2 يقرالك (الصبي)3
وطور (أمحمداوي)4 ودارمي و موال
ربابه أيوّن ...
(يكاظم مهجتي الهجران عادمها)5
ماتشتاك.......
لموَنس التراجي....
لبلام باب السيف
وأتهد الكَلب غرنوك
وليالي الصيف تعلوله ....
والسطح يركص حـصاد
أبريش حـضـن أمك تنام
وخيط الشمس غبشه ...
أتزور للكاظم
(أبكاري)6 المـرصـع شذر
الراضـع من حليب الكُمر ، والنجمه
ماتشتاك.......
صينية فرح ، وأشموع خـضر الياس
وأتطش الفرح بملبس الحضره
وبشباج (أمام الورد) 7 ...
تعكد خيط
نذر أكلوبنه الخـضـره
وجُمار الزنود ، وديرم الشفتين
وأبنيات......
تشتم أبورد خصره
خايب .... ولك خايب ...
صحن (أمام الورد) ، مملي أعشوش ...
أفراش ويحضن الفقره
ماتشتاك ........
جحيل الغربه مُره ..
أترجف أثيابك
وعيونك محطه ........
ويامحطه الردت أحبابك
تلهم ليل جمرك...
من يُدك بابك
وكليبَك حمامة بيت
خايب .....
ولك خايب
مثل وجهَك ضميرك.....
رازقي وقداح
يانخلة حماد........
ومدت السباح
ماتشتاك...ماتشتاك
ما......تش....تا....ك
***
2007 م
1 :خنياب:طافح بالماء
2 :داخل حسن:مطرب ريفي
3،4:طور للغناء العراقي
5:أغنية لداخل حسن
6كاري:وسيلة نقل قديمة تسيرعلى سكة حديدية تسحب بستة
خيول تنطلق من قرب جسر الشهداء تصل للكاظمية المقدسة
7أمام الورد:ديوان شعر لرياض النعماني
ليست هناك تعليقات:
إرسال تعليق